ບຸກຄົນຂ້າຄວາມໂກດໄດ້ຍ່ອມນອນເປັນສຸກ ຂ້າຄວາມໂກດໄດ້ຍ່ອມບໍ່ເສົ້າໂສກ
ສະໄໝໜຶ່ງພຣະຜູ້ມີພຣະພາກເຈົ້າປະທັບຢູ່ໃນພຣະວິຫານເວລຸວັນ ອັນເປັນທີ່ພຣະຣາຊະທານເຫຍື່ອແກ່ກະແຕ ເຂດພຣະນະຄອນຣາຊະຄຶ ກໍໂດຍສະໄໝນັ້ນ ນາງພຣາມມະນີຊື່ ທະນັນຊານີແຫ່ງພຣາມ...ເປັນຜູ້ເຫລື້ອມໃສຢ່າງຍິ່ງໃນພຣະພຸດທະເຈົ້າ ໃນພຣະທັມ ແລະ ພຣະສົງຄ໌.
ຄັ້ງນັ້ນ ນາງທະນັນຊານີພຣາມມະນີກຳລັງນຳພັດຕາຫານເຂົ້າໄປໃຫ້ທ່ານພຣາມພາຣະທະວາຊະໂຄດ ກ້າວຂາພາດ ຈຶ່ງເປັ່ງອຸທານ 3 ຄັ້ງວ່າ ຂໍນອບນ້ອມແດ່ພຣະຜູ້ມີພຣະພາກອະຣະຫັນຕະສັມມາສັມພຸດທະເຈົ້າ ພຣະອົງຄ໌ນັ້ນ ຯລຯ ເມື່ອນາງທະນັນຊານີພຣາມມະນີກ່າວຢ່າງນີ້ແລ້ວ ພຣາມພາຣະທະວາຊະໂຄດໄດ້ກ່າວກັບນາງທະນັນຊານີພຣາມມະນີວ່າ ເຈົ້າຍິງຊົ່ວນີ້ ບໍ່ວ່າໃນທີ່ໃດໆ ກໍກ່າວຄຸນຂອງສະມະນະໂລ້ນຢ່າງນີ້ໆ ເຈົ້າຍິງຊົ່ວ ບັດນີ້ເຮົາຈັກໄປໂຕ້ວາທະກັບພຣະສາສະດາຂອງເຈົ້ານັ້ນ.
ນາງທະນັນຊານີພຣາມມະນີກ່າວວ່າ: ພຣາມ ຂ້ອຍຍັງບໍ່ເຫັນບຸກຄົນໃດທີ່ຈະຍົກຖ້ອຍຄຳຕໍ່ພຣະຜູ້ມີພຣະພາກອະຣະຫັນຕະສັມມາສັມພຸດທະເຈົ້າພຣະອົງຄ໌ນັ້ນໃນໂລກ ພ້ອມທັງເທວະໂລກ ມານຣະໂລກ ພຣົມມະໂລກ ໃນໝູ່ສັດຕະພ້ອມທັງສະມະນະພຣາມ ເທວະດາ ແລະ ມະນຸດ; ຂ້າແຕ່ພຣາມ ເອົາເຖີດ ທ່ານຈະໄປກໍໄດ້ ເມື່ອໄປແລ້ວກໍຈະຮູ້ເອງ.
ລຳດັບນັ້ນ ພຣາມພາຣະທະວາຊະໂຄດໂກດຂັດໃຈ ເຂົ້າໄປຫາພຣະຜູ້ມີພຣະພາກເຈົ້າເຖິງທີ່ປະທັບ...ເມື່ອພຣາມພາຣະທະວາຊະໂຄດນັ່ງໃນທີ່ຄວນສ່ວນຂ້າງໜຶ່ງແລ້ວ ໄດ້ກ່າວກັບພຣະຜູ້ມີພຣະພາກເຈົ້າດ້ວຍຄາຖາວ່າ:
ບຸກຄົນຂ້າອັນໃດໄດ້ ຍ່ອມນອນເປັນສຸກ ຂ້າອັນໃດໄດ້ ຍ່ອມບໍ່ເສົ້າໂສກ ຂ້າແຕ່ພຣະໂຄດົມ ພຣະອົງຄ໌ຍ່ອມຊອບໃຈການຂ້າທັມອັນໃດວ່າເປັນທັມອັນເອກ?
ພຣະຜູ້ມີພຣະພາກເຈົ້າກວ່າຕອບວ່າ
ບຸກຄົນຂ້າຄວາມໂກດໄດ້ຍ່ອມນອນເປັນສຸກ ຂ້າຄວາມໂກດໄດ້ຍ່ອມບໍ່ເສົ້າໂສກ.
ພຣາມ! ພຣະອະຣິຍະເຈົ້າທັງຫລາຍຍ່ອມສັນລະເສີນການຂ້າຄວາມໂກດອັນມີມູນເປັນພິດ ມີຍອດຫວານ ເພາະວ່າບຸກຄົນຂ້າຄວາມໂກດນັ້ນໄດ້ແລ້ວ ຍ່ອມບໍ່ເສົ້າໂສກ.
ເມື່ອພຣະຜູ້ມີພຣະພາກເຈົ້າກວ່າຢ່າງນີ້ແລ້ວ ພຣາມພາຣະທະວາຊະໂຄດໄດ້ກຣາບທູນວ່າ ຂ້າແຕ່ພຣະໂຄດົມຜູູ້ຈະເຣີນ ພາສິດຂອງພຣະອົງຄ໌ແຈ່ມແຈ້ງຫລາຍ, ຂ້າແຕ່ພຣະໂຄດົມຜູ້ຈະເຣີນ ພາສິດຂອງພຣະອົງຄ໌ແຈ່ມແຈ້ງຫລາຍ ພຣະໂຄດົມຜູ້ຈະເຣີນຊົງປະກາດທັມໂດຍອະເນກປະຣິຍາຍ ປຽບເໝືອນບຸກຄົນຫງາຍຂອງທີ່ຂວ້ຳ ເປີດຂອງທີ່ປິດ ບອກທາງແກ່ຄົນຫລົງທາງ ຫລື ສ່ອງປະທີບໄວ້ໃນທີ່ມືດ ດ້ວຍຕັ້ງໃຈວ່າ ຄົນມີດວງຕາຈັກເຫັນຮູບໄດ້ ສັນນັ້ນ; ຂ້ານ້ອຍຂໍເຖິງພຣະໂຄດົມຜູ້ຈະເຣີນ ກັບທັງພຣະທັມ ແລະ ພຣະພິກຂຸສົງຄ໌ວ່າເປັນສະຣະນະ ຂ້ານ້ອຍຂໍບັນພະຊາ ແລະ ອຸປະສົມບົດໃນສຳນັກຂອງພຣະໂຄດົມຜູ້ຈະເຣີນ.
ພຣາມພາຣະທະວາຊະໂຄດໄດ້ບັນພະຊາ ໄດ້ອຸປະສົມບົດແລ້ວໃນສຳນັກຂອງພຣະຜູ້ມີພຣະພາກເຈົ້າ ເມື່ອທ່ານພາຣະທະວາຊະອຸປະສົມບົດແລ້ວບໍ່ນານ ຫລີກໄປຢູ່ຜູ້ດຽວບໍ່ປະໝາດ ມີຄວາມພຽນ ມີຕົນສົ່ງໄປຢູ່ ບໍ່ນານເທົ່າໃດກໍກະທຳໃຫ້ແຈ້ງເຊິ່ງຄຸນວິເສດອັນຍອດຢ້ຽມ ເປັນທີ່ສຸດແຫ່ງພຣົມມະຈັນ ເຊິ່ງກຸລະບຸດທັງຫລາຍຜູ້ອອກຈາກເຮືອນບວດເປັນບັນພະຊິດໂດຍຊອບ ມີຄວາມຕ້ອງການ ດ້ວຍປັນຍາອັນຍິ່ງເອງໃນປັດຈຸບັນເຂົ້າເຖິງຢູ່ ໄດ້ຮູ້ຊັດວ່າ ຊາດສິ້ນແລ້ວ ພຣົມມະຈັນຢູ່ຈົບແລ້ວ ກິດທີ່ຄວນທຳໄດ້ທຳສຳເລັດແລ້ວ ກິດອື່ນເພື່ອຄວາມເປັນຢ່າງນີ້ບໍ່ໄດ້ມີອີກ ທ່ານພຣະພາຣະທະວາຊະໄດ້ເປັນພຣະອະຣະຫັນຕ໌ອົງຄ໌ໜຶ່ງໃນບັນດາພຣະອະຣະຫັນຕ໌ທັງຫລາຍ.
.............................................................
ສຸຕຕັນຕະປິດົກ ສັງຍຸຕຕະນິກາຍ ສະຄາຖະວັກ ໑໕/໑໙໔-໑໙໕/໖໒໖-໖໓໐
Comments
Post a Comment