ສະລາຍະຕະນະວິພັງ(ການຈຳແນກອາຍະຕະນະໂດຍລະອຽດ)
ພິກຂຸທັງຫຼາຍ! ເຮົາຈັກສະແດງສະລາຍະຕະນະວິພັງແກ່ທ່ານທັງຫຼາຍ ທ່ານທັງຫຼາຍຈົ່ງຟັງສະລາຍະຕະນະວິພັງນັ້ນ ຈົ່ງໃສ່ໃຈໃຫ້ດີ ເຮົາຈັກກ່າວ.
ພິກຂຸທັງຫຼາຍ! ທ່ານທັງຫຼາຍພຶງຮູ້ອາຍະຕະນະພາຍໃນ 6 ອາຍະຕະນະພາຍນອກ 6 ວິນຍານ 6 ຜັດສະ 6 ມະໂນປະວິຈານ 18 ສັດຕະບົດ 36 ໃນທຳເຫຼົ່ານັ້ນ ທ່ານທັງຫຼາຍອາໄສທຳນີ້ແລ້ວ ຈົ່ງລະທຳນີ້ເສຍ ແລະ ພຶງຮູ້ສະຕິປັດຖານ 3 ທີ່ພຣະອະຣິຍະເສບ ຊຶ່ງເມື່ອເສບຢູ່ຊື່ວ່າ ເປັນຜູ້ສອນຄວນເພື່ອສັ່ງສອນໝູ່ ອັນເຮົາເອີ້ນວ່າເປັນສາຣະຖີຜູ້ສາມາດຝຶກບຸຣຸດທີ່ຄວນຝຶກໄດ້ຢ່າງຢອດຢ້ຽມກວ່າອາຈານຜູ້ຝຶກທັງຫຼາຍ ນີ້ເປັນອຸດເທດແຫ່ງສະລາຍະຕະນະວິພັງ.
1. ມະໂນປະວິຈານ ແປວ່າ ຄວາມພິຈາລະນາທາງໃຈ, ໃຈທີ່ພິຈາລະນາຢ່າງທົ່ວເຖິງ.
2. ສັດຕະບົດ ແປວ່າ ທາງໄປຂອງສັດ.
ຄຳທີ່ເຮົາກ່າວແລ້ວວ່າ ພຶງຮູ້ອາຍະຕະນະພາຍໃນ 6 ດັ່ງນີ້ນັ້ນ ເຮົາອາໃສຫຍັງກ່າວ ຄື:
ອາຍະຕະນະຄື ຕາ
ອາຍະຕະນະຄື ຫູ
ອາຍະຕະນະຄື ດັງ
ອາຍະຕະນະຄື ລິ້ນ
ອາຍະຕະນະຄື ກາຍ
ອາຍະຕະນະຄື ໃຈ
ຄຳທີ່ເຮົາກ່າວແລ້ວວ່າ ພຶງຮູ້ອາຍະຕະນະພາຍໃນ 6 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
ຄຳທີ່ເຮົາກ໋າວແລ້ວວ່າ ພຶງຮູ້ອາຍະຕະນະພາຍນອກ 6 ດັ່ງນີ້ນັ້ນ ເຮົາອາໄສຫຍັງກ່າວ ຄື:
ອາຍະຕະນະຄື ຮູບ
ອາຍະຕະນະຄື ສຽງ
ອາຍະຕະນະຄື ກິ່ນ
ອາຍະຕະນະຄື ຣົດ
ອາຍະຕະນະຄື ໂຜດຖັບພະ(ສຳຜັດທາງກາຍ)
ອາຍະຕະນະຄື ທຳ
ຄຳທີ່ເຮົາກ່າວແລ້ວວ່າ ພຶງຮູ້ອາຍະຕະນະພາຍນອກ 6 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
ຄຳທີ່ເຮົາກ່າວແລ້ວວ່າ ພຶງຮູ້ວິນຍານ 6 ດັ່ງນີ້ນັ້ນ ເຮົາອາໃສຫຍັງກ່າວ ຄື:
ຈັກຂຸວິນຍານ(ຄວາມຮູ້ແຈ້ງທາງຕາ)
ໂສຕະວິນຍານ(ຄວາມຮູ້ແຈ້ງທາງຫູ)
ຄານະວິນຍານ(ຄວາມຮູ້ແຈ້ງທາງດັງ)
ຊິວຫາວິນຍານ(ຄວາມຮູ້ແຈ້ງທາງລິ້ນ)
ກາຍະວິນຍານ(ຄວາມຮູ້ແຈ້ງທາງກາຍ)
ມະໂນວິນຍານ(ຄວາມຮູ້ແຈ້ງທາງໃຈ)
ຄຳທີ່ເຮົາກ່າວແລ້ວວ່າ ພຶງຮູ້ວິນຍານ 6 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
ຄຳທີ່ເຮົາກ່າວແລ້ວວ່າ ພຶງຮູ້ຜັດສະ 6 ດັ່ງນີ້ນັ້ນ ເຮົາອາໃສຫຍັງກ່າວ ຄື:
ຈັກຂຸສຳຜັດ(ສຳຜັດທາງຕາ)
ໂສຕະສຳຜັດ(ສຳຜັດທາງຫູ)
ຄານະສຳຜັດ(ສຳຜັດທາງດັງ)
ຊິວຫາສັມຜັດ(ສຳຜັດທາງລິ້ນ)
ກາຍະສຳຜັດ(ສຳຜັດທາງກາຍ)
ມະໂນສຳຜັດ(ສຳຜັດທາງໃຈ)
ຄຳທີ່ເຮົາກ່າວແລ້ວວ່າ ພຶງຮູ້ຜັດສະ 6 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
ຄຳທີ່ເຮົາກ່າວແລ້ວວ່າ ພຶງຮູ້ມະໂນປະວິຈານ 18 ດັ່ງນີ້ນັ້ນ ເຮົາອາໃສຫຍັງກ່າວ ຄື ບຸກຄົນເຫັນຮູບທາງຕາແລ້ວ ຍ່ອມພິຈາລະນາຮູບ ອັນເປັນທີ່ຕັ້ງແຫ່ງໂສມະນັດ ຍ່ອມພິຈາລະນາຮູບອັນເປັນທີ່ຕັ້ງແຫ່ງໂທມະນັດ ຍ່ອມພິຈາລະນາຮູບອັນເປັນທີ່ຕັ້ງແຫ່ງອຸເບກຂາໄວ້
ຟັງສຽງທາງຫູແລ້ວ ...
ດົມກລິ່ນທາງດັງແລ້ວ ...
ລິ້ມຣົດທາງລິ້ນແລ້ວ ...
ຖືກຕ້ອງໂຜດຖັບພະທາງກາຍແລ້ວ ...
ຮູ້ແຈ້ງທຳທາງໃຈແລ້ວ ຍ່ອມພິຈາລະນາທຳອັນເປັນທີ່ຕັ້ງແຫ່ງໂສມະນັດ ຍ່ອມພິຈາລະນາທຳອັນເປັນທີ່ຕັ້ງແຫ່ງໂທມະນັດ ຍ່ອມພິຈາລະນາທຳອັນເປັນທີ່ຕັ້ງແຫ່ງອຸເບກຂາໄວ້ ການພິຈາລະນາຝ່າຍໂສມະນັດ 6 ຝ່າຍໂທມະນັດ 6 ຝ່າຍອຸເບກຂາ 6 ຍ່ອມມີດ້ວຍປະການຢ່າງນີ້ ຄຳທີ່ເຮົາກ່າວແລ້ວວ່າ ພຶງຮູ້ມະໂນປະວິຈານ 18 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
ຄຳທີ່ເຮົາກ່າວແລ້ວວ່າ ພຶງຮູ້ສັດຕະບົດ 36 ດັ່ງນີ້ນັ້ນ ເຮົາອາໃສຫຍັງກ່າວ ຄື ໂສມະນັດອາໃສເຮືອນ 6 ໂສມະນັດອາໃສເນກຂັມມະ 6 ໂທມະນັດອາໄສເຮືອນ 6 ໂທມະນັດອາໃສເນກຂັມມະ 6 ອຸເບກຂາອາໃສເຮືອນ 6 ອຸເບກຂາອາໃສເນກຂັມມະ 6 ໃນສັດຕະບົດ 36 ນັ້ນ ໂສມະນັດອາໃສເຮືອນ 6 ປະການ ຫຍັງດ້ວຍ ຄື:
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ຮູບ ທີ່ພຶງຮູ້ແຈ້ງທາງ ຕາ ອັນໜ້າປາດຖະຫນາ ໜ້າຮັກໃຄ້ ໜ້າພໍໃຈ ໜ້າຣື່ນຣົມໃຈປະກອບດ້ວຍໂລກາມິດ ໂດຍເປັນຂອງອັນຕົນໄດ້ສະເພາະ ຫລື ຫວັນຣະນຶກເຖິງຮູບທີ່ຕົນເຄີຍໄດ້ມາກ່ອນ ອັນລ່ວງໄປແລ້ວ ດັບໄປແລ້ວ ເເປປ່ວນໄປແລ້ວ ໂສມະນັດເຊັ່ນນີ້ເຮົາເອີ້ນວ່າ ໂສມະນັດອາໃສເຮືອນ
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ສຽງ ທີ່ພຶງຮູ້ແຈ້ງທາງ ຫູ ...
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ກິ່ນ ທີ່ພຶງຮູ້ແຈ້ງທາງ ດັງ ...
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ຣົດ ທີ່ພຶງຮູ້ແຈ້ງທາງ ລິ້ນ ...
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ໂຜດຖັບພະ ທີ່ພຶງຮູ້ແຈ້ງທາງ ກາຍ ...
ໂສມະນັດຍ່ອມເກີດຂຶ້ນແກ່ບຸກຄົນຜູ້ພິຈາລະນາເຫັນການໄດ້ສະເພາະຊຶ່ງ ທຳ ທີ່ພຶງຮູ້ແຈ້ງ ທາງໃຈ ທີ່ໜ້າປາດຖະຫນາ ໜ້າຮັກໃຄ້ ໜ້າພໍໃຈ ໜ້າຣື່ນຣົມໃຈ ປະກອບດ້ວຍໂລກາມິດ ໂດຍເປັນຂອງອັນຕົນໄດ້ສະເພາະ ຫລື ຫວນຣະນຶກເຖິງທຳທີ່ຕົນເຄີຍໄດ້ມາກ່ອນ ອັນລ່ວງໄປແລ້ວ ດັບໄປແລ້ວ ປັ່ນປ່ວນໄປແລ້ວ ໂສມະນັດເຊັ່ນນີ້ເຮົາເອີ້ນວ່າ ໂສມະນັດອາໄສເຮືອນ.
ເຫຼົ່ານີ້ແລໂສມະນັດອາໃສເຮືອນ 6 ປະການ.
--------------------------------------
ໃນສັດຕະບົດ 36 ນັ້ນ ໂສມະນັດອາໃສເນກຂັມມະ 6 ປະການ, 6 ປະການຄື:
ໂສມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ຮູບ ທັງຫຼາຍນັ້ນແລບໍ່ທ່ຽງ ເຫັນຄວາມເເປປ່ວນ ຄວາມຄາຍກຳໜັດ ແລະ ຄວາມດັບນັ້ນ ດ້ວຍປັນຍາອັນຊອບຕາມທີ່ເປັນຈິງຢ່າງນີ້ວ່າ ຮູບ ໃນການກ່ອນ ແລະ ໃນບັດນີ້ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມປັ່ນປ່ວນເປັນທຳມະດາ ໂສມະນັດເຊັ່ນນີ້ ເຮົາເອີ້ນວ່າ ໂສມະນັດອາໃສເນກຂັມມະ
ໂສມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ສຽງ ທັງຫຼາຍນັ້ນແລບໍ່ທ່ຽງ ...
ໂສມະນັດຄວນເກີດຂຶ້ນແກ່ບຸກຄົນຜູ້ຮູ້ຄວາມທີ່ ກີ່ນ ທັງຫຼາຍນັ້ນແລບໍ່ທ່ຽງ ...
ໂສມະນັດຄວນເກີດຂຶ້ນແກ່ບຸກຄົນຜູ້ຮູ້ຄວາມທີ່ ຣົດ ທັງຫຼາຍນັ້ນແລບໍ່ທ່ຽງ ...
ໂສມະນັດຄວນເກີດຂຶ້ນແກ່ບຸກຄົນຜູ້ຮູ້ຄວາມທີ່ ໂຜດຖັບພະ ທັງຫຼາຍນັ້ນແລບໍ່ທ່ຽງ ...
ໂສມະນັດຄວນເກີດຂຶ້ນແກ່ບຸກຄົນຜູ້ຮູ້ຄວາມທີ່ ທຳ ທັງຫຼາຍນັ້ນແລບໍ່ທ່ຽງ ເຫັນຄວາມປັ່ນປ່ວນ ຄວາມຄລາຍກຳໜັດ ແລະ ຄວາມດັບນັ້ນດ້ວຍປັນຍາອັນຊອບຕາມທີ່ເປັນຈິງຢ່າງນີ້ວ່າ ທຳ ໃນການກ່ອນ ແລະ ໃນບັດນີ້ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມປັ່ນປ່ວນເປັນທຳມະດາ ໂສມະນັດເຊັ່ນນີ້ ເຮົາເອີ້ນວ່າ ໂສມະນັດອາໃສເນກຂັມມະ.
ເຫຼົ່ານີ້ແລໂສມະນັດອາໃສເນກຂັມມະ 6 ປະການ.
--------------------------------------
ໃນສັດຕະບົດ 36 ນັ້ນ ໂທມະນັດອາໃສເຮືອນ 6 ປະການ, 6 ປະການຄື:
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ຮູບ ທີ່ພຶງຮູ້ແຈ້ງທາງ ຕາ ທີ່ໜ້າປາດຖະຫນາ ໜ້າຮັກໃຄ້ ໜ້າພໍໃຈ ໜ້າຣື່ນຣົມໃຈ ປະກອບດ້ວຍໂລກາມິດ ໂດຍເປັນຂອງອັນຕົນບໍ່ໄດ້ສະເພາະ ຫລື ຫວນຣະນຶກເຖິງຮູບທີ່ຕົນບໍ່ເຄຍໄດ້ມາກ່ອນ ອັນລ່ວງໄປແລ້ວ ດັບໄປແລ້ວ ປັ່ນປ່ວນໄປແລ້ວ ໂທມະນັດເຊັ່ນນີ້ ເຮົາເອີ້ນວ່າ ໂທມະນັດອາໃສເຮືອນ.
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ສຽງ ທີ່ພຶງຮູ້ແຈ້ງທາງ ຫູ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ກິ່ນ ທີ່ພຶງຮູ້ແຈ້ງທາງ ດັງ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ຣົດ ທີ່ພຶງຮູ້ແຈ້ງທາງ ລິ້ນ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ໂຜດຖັບພະ ທີ່ພຶງຮູ້ແຈ້ງທາງ ກາຍ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ເຫັນຄວາມບໍ່ໄດ້ສະເພາະຊຶ່ງ ທຳ ທີ່ພຶງຮູ້ແຈ້ງທາງ ໃຈ ທີ່ໜ້າປາດຖະຫນາ ໜ້າຮັກໃຄ້ ໜ້າພໍໃຈ ໜ້າຣື່ນຣົມໃຈ ປະກອບດ້ວຍໂລກາມິດ ໂດຍເປັນຂອງອັນຕົນບໍ່ໄດ້ສະເພາະ ຫລື ຫວັນຣະນຶກເຖິງທຳທີ່ຕົນບໍ່ເຄຍໄດ້ມາກ່ອນ ອັນລ່ວງໄປແລ້ວ ດັບໄປແລ້ວ ປັ່ນປ່ວນໄປແລ້ວ ໂທມະນັດເຊັ່ນນີ້ ເຮົາເອີ້ນວ່າ ໂທມະນັດອາໃສເຮືອນ.
ເຫຼົ່ານີ້ແລໂທມະນັດອາໃສເຮືອນ 6 ປະການ.
--------------------------------------
ໃນສັດຕະບົດ 36 ນັ້ນ ໂທມະນັດອາໃສເນກຂັມມະ 6 ປະການ, 6 ປະການຄື:
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ຮູບທັງຫຼາຍນັ້ນແລບໍ່ທ່ຽງ ເຫັນຄວາມເເປປ່ວນ ຄວາມຄາຍກຳໜັດ ແລະ ຄວາມດັບນັ້ນຕາມຄວາມເປັນຈິງ ດ້ວຍປັນຍາອັນຊອບຢ່າງນີ້ວ່າ ຮູບໃນການກ່ອນ ແລະ ໃນບັດນີ້ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມປັ່ນປ່ວນເປັນທຳມະດາ ແລ້ວຕັ້ງຄວາມປາດຖະຫນາໃນອະນຸດຕະຣະວິໂມກວ່າ ໃນການໃດ ເຮົາຈັກບັນລຸຕະທາຍະຕະນັງ ທີ່ພຣະອະຣິຍະທັງຫຼາຍໄດ້ບັນລຸຢູ່ໃນບັດນີ້ເພາະຄວາມປາດຖະຫນາເປັນປັດໃຈ ໂທມະນັດຈຶ່ງເກີດຂຶ້ນແກ່ບຸກຄົນຜູ້ຕັ້ງຄວາມປາດຖະຫນາໃນອະນຸດຕະຣະວິໂມກດ້ວຍປະການຢ່າງນີ້ ໂທມະນັດເຊັ່ນນີ້ ເຮົາເອີ້ນວ່າ ໂທມະນັດອາໃສເນກຂັມມະ.
(ຂໍ້ສັງເກດ ໃຫ້ເບິ່ງຄວາມຫມາຍຂອງຕະທາຍະຕະນັງ ໄດ້ທີ່ ພຣະໄຕຣປິດົກສະບັບສະຢາມຣັດ ເລ່ມທີ່ ໒໕ ໜ້າ ໒໐໖ ຂໍ້ ໑໕໘.)
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ສຽງ ທັງຫຼາຍນັ້ນແລບໍ່ທ່ຽງ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ກິ່ນ ທັງຫຼາຍນັ້ນແລບໍ່ທ່ຽງ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ຣົດ ທັງຫຼາຍນັ້ນແລບໍ່ທ່ຽງ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ໂຜດຖັບພະ ທັງຫຼາຍນັ້ນແລບໍ່ທ່ຽງ ...
ໂທມະນັດຍ່ອມເກີດຂຶ້ນແກ່ບຸກຄົນຜູ້ຮູ້ຄວາມທີ່ ທຳ ທັງຫຼາຍນັ້ນແລບໍ່ທ່ຽງ ເຫັນຄວາມປັ່ນປ່ວນ ຄວາມຄາຍກຳໜັດ ແລະ ຄວາມດັບນັ້ນຕາມຄວາມເປັນຈິງ ດ້ວຍປັນຍາອັນຊອບຢ່າງນີ້ວ່າ ທຳ ໃນການກ່ອນ ແລະ ໃນບັດນີ້ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມເເປປ່ວນເປັນທຳມະດາ ແລ້ວຕັ້ງຄວາມປາດຖະຫນາໃນອະນຸດຕະຣະວິໂມກວ່າ ໃນການໃດ ເຮົາຈັກບັນລຸຕະທາຍະຕະນັງ ທີ່ພຣະອະຣິຍະທັງຫຼາຍໄດ້ບັນລຸຢູ່ໃນບັດນີ້ ເພາະຄວາມປາດຖະຫນາເປັນປັດໃຈ ໂທມະນັດຈຶ່ງເກີດຂຶ້ນແກ່ບຸກຄົນຜູ້ຕັ້ງຄວາມປາດຖະຫນາໃນອະນຸດຕະຣະວິໂມກດ້ວຍປະການຢ່າງນີ້ ໂທມະນັດເຊັ່ນນີ້ ເຮົາເອີ້ນວ່າ ໂທມະນັດອາໃສເນກຂັມມະ.
ເຫຼົ່ານີ້ແລໂທມະນັດອາໃສເນກຂັມມະ 6 ປະການ.
--------------------------------------
ໃນສັດຕະບົດ 36 ນັ້ນ ອຸເບກຂາອາໃສເຮືອນ 6 ປະການ, 6 ປະການຄື:
ເພາະເຫັນ ຮູບ ທາງ ຕາ ອຸເບກຂາຈຶ່ງເກີດຂຶ້ນແກ່ປຸຖຸຊົນ ຜູ້ໂງ່ ງົມງາຍ ຜູ້ຍັງບໍ່ຊະນະກິເລດ ຍັງບໍ່ຊະນະວິບາກ ຜູ້ບໍ່ເຫັນໂທດ ບໍ່ໄດ້ສະດັບ ເປັນຄົນກິເລດໜາ ອຸເບກຂາເຊັ່ນນີ້ຍັງລ່ວງພົ້ນຮູບບໍ່ໄດ້ ເພາະສະນັ້ນ ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເຮືອນ.
ເພາະຟັງ ສຽງ ທາງ ຫູ ອຸເບກຂາຈຶ່ງເກີດຂຶ້ນ...
ເພາະດົມ ກິ່ນ ທາງ ດັງ ອຸເບກຂາຈຶ່ງເກີດຂຶ້ນ...
ເພາະລິ້ມ ຣົດ ທາງ ລິ້ນ ອຸເບກຂາຈຶ່ງເກີດຂຶ້ນ...
ເພາະຖືກຕ້ອງ ໂຜດຖັບພະ ທາງ ກາຍ ອຸເບກຂາຈຶ່ງເກີດຂຶ້ນ...
ເພາະຮູ້ແຈ້ງທຳທາງ ໃຈ ອຸເບກຂາຈຶ່ງເກີດຂຶ້ນແກ່ປຸຖຸຊົນ ຜູ້ໂງ່ ງົມງາຍ ຜູ້ຍັງບໍ່ຊະນະກິເລດ ຢັງບໍ່ຊະນະວິບາກ ຜູ້ບໍ່ເຫັນໂທດ ບໍ່ໄດ້ສະດັບ ເປັນຄົນກິເລດໜາ ອຸເບກຂາເຊັ່ນນັ້ນຍັງລ່ວງພົ້ນທຳບໍ່ໄດ້ ເພາະສະນັ້ນ ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເຮືອນ.
ເຫຼົ່ານີ້ແລອຸເບກຂາອາໃສເຮືອນ 6 ປະການ.
--------------------------------------
ໃນສັດຕະບົດ 36 ນັ້ນ ອຸເບກຂາອາໃສເນກຂັມມະ 6 ປະການ ຫຍັງດ້ວຍ ຄື:
ເພາະຮູ້ຄວາມທີ່ ຮູບ ທັງຫຼາຍນັ້ນແລວ່າບໍ່ທ່ຽງ ເຫັນຄວາມເເປປ່ວນ ຄວາມຄາຍກຳໜັດ ແລະ ຄວາມດັບວ່າ ຮູບໃນການກ່ອນ ແລະ ໃນບັດນີ້ ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມເເປປ່ວນເປັນທຳມະດາ ດ້ວຍປັນຍາໂດຍຊອບຕາມທີ່ເປັນຈິງຢ່າງນີ້ ອຸເບກຂາຍ່ອມເກີດຂຶ້ນ ອຸເບກຂາເຊັ່ນນີ້ນັ້ນຍ່ອມລ່ວງພົ້ນຮູບໄດ້ ເພາະສະນັ້ນ ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເພາະຮູ້ຄວາມທີ່ ສຽງ ທັງຫຼາຍນັ້ນແລວ່າບໍ່ທ່ຽງ ... ອຸເບກຂາຍ່ອມເກີດຂຶ້ນ ... ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເພາະຮູ້ຄວາມທີ່ ກິ່ນ ທັງຫຼາຍນັ້ນແລວ່າບໍ່ທ່ຽງ ... ອຸເບກຂາຍ່ອມເກີດຂຶ້ນ ... ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເພາະຮູ້ຄວາມທີ່ ຣົດ ທັງຫຼາຍນັ້ນແລວ່າບໍ່ທ່ຽງ ... ອຸເບກຂາຍ່ອມເກີດຂຶ້ນ ... ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເພາະຮູ້ຄວາມທີ່ ໂຜດຖັບພະ ທັງຫຼາຍນັ້ນແລວ່າບໍ່ທ່ຽງ ... ອຸເບກຂາຍ່ອມເກີດຂຶ້ນ ... ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເພາະຮູ້ຄວາມທີ່ທຳທັງຫຼາຍນັ້ນແລວ່າບໍ່ທ່ຽງ ເຫັນຄວາມປັ່ນປ່ວນ ຄວາມຄລາຍກຳໜັດ ແລະ ຄວາມດັບວ່າ ທຳ ໃນການກ່ອນ ແລະ ໃນບັດນີ້ ທັງໝົດນັ້ນ ລ້ວນບໍ່ທ່ຽງ ເປັນທຸກ ມີຄວາມປັ່ນປ່ວນເປັນທຳມະດາ ດ້ວຍປັນຍາໂດຍຊອບຕາມທີ່ເປັນຈິງຢ່າງນີ້ ອຸເບກຂາຍ່ອມເກີດຂຶ້ນ ອຸເບກຂາເຊັ່ນນີ້ນັ້ນຍ່ອມລ່ວງພົ້ນທຳໄດ້ ເພາະສະນັ້ນ ເຮົາຈຶ່ງເອີ້ນອຸເບກຂານັ້ນວ່າ ອຸເບກຂາອາໃສເນກຂັມມະ.
ເຫຼົ່ານີ້ແລອຸເບກຂາອາໃສເນກຂັມມະ 6 ປະການ.
ຄຳທີ່ເຮົາກ່າວແລ້ວວ່າ ພຶງຮູ້ສັດຕະບົດ 36 ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
--------------------------------------
ຄຳທີ່ເຮົາກ່າວແລ້ວວ່າ ໃນສັດຕະບົດ 36 ນັ້ນ ທ່ານທັງຫຼາຍອາໃສທຳນີ້ ແລ້ວຈົ່ງລະທຳນີ້ເສຍ ເພາະອາໃສເຫດຫຍັງ ເຮົາຈຶ່ງກ່າວໄວ້ເຊັ່ນນັ້ນ
ພິກຂຸທັງຫຼາຍ! ໃນສັດຕະບົດ 36 ນັ້ນ ທ່ານທັງຫຼາຍຈົ່ງອາໃສພຶ່ງພິງ ໂສມະນັດອາໃສເນກຂັມມະ 6 ນັ້ນແລ້ວ ຈົ່ງລະ ຈົ່ງກ້າວລ່ວງ ໂສມະນັດອາໃສເຮືອນ 6 ນັ້ນເສຍ ການລະ ການກ້າວລ່ວງໂສມະນັດເຫຼົ່ານັ້ນມີໄດ້ດ້ວຍອາການຢ່າງນີ້.
--------------------------------------
ໃນສັດຕະບົດ 36 ນັ້ນ ທ່ານທັງຫຼາຍອາໃສພຶ່ງພິງ ໂທມະນັດອາໃສເນກຂັມມະ 6 ນັ້ນແລ້ວ ຈົ່ງລະ ຈົ່ງກ້າວລ່ວງ ໂທມະນັດອາໃສເຮືອນ 6 ນັ້ນເສຍ ການລະ ການກ້າວລ່ວງ ໂທມະນັດເຫຼົ່ານັ້ນມີໄດ້ດ້ວຍອາການຢ່າງນີ້.
--------------------------------------
ໃນສັດຕະບົດ 36 ນັ້ນ ທ່ານທັງຫຼາຍອາໃສພຶ່ງພິງ ອຸເບກຂາອາໃສເນກຂັມມະ 6 ນັ້ນແລ້ວ ຈົ່ງລະ ຈົ່ງກ້າວລ່ວງ ອຸເບກຂາອາໃສເຮືອນ 6 ນັ້ນເສຍ ການລະ ການກ້າວລ່ວງ ອຸເບກຂາເຫຼົ່ານັ້ນມີໄດ້ດ້ວຍອາການຢ່າງນີ້.
--------------------------------------
ໃນສັດຕະບົດ 36 ນັ້ນ ທ່ານທັງຫຼາຍອາໃສພຶ່ງພິງ ໂສມະນັດອາໃສເນກຂັມມະ 6 ນັ້ນແລ້ວ ຈົ່ງລະ ຈົ່ງກ້າວລ່ວງ ໂທມະນັດອາໃສເນກຂັມມະ 6 ນັ້ນເສຍ ການລະ ການກ້າວລ່ວງ ໂທມະນັດເຫຼົ່ານັ້ນມີໄດ້ດ້ວຍອາການຢ່າງນີ້.
--------------------------------------
ພິກຂຸທັງຫຼາຍ! ໃນສັດຕະບົດ 36 ນັ້ນ ທ່ານທັງຫຼາຍອາໃສພຶ່ງພິງ ອຸເບກຂາອາໃສເນກຂັມມະ 6 ນັ້ນແລ້ວ ຈົ່ງລະ ຈົ່ງກ້າວລ່ວງ ໂສມະນັດອາໃສເນກຂັມມະ 6 ນັ້ນເສຍ ການລະ ການກ້າວລ່ວງໂສມະນັດເຫຼົ່ານັ້ນມີໄດ້ດ້ວຍອາການຢ່າງນີ້.
--------------------------------------
--------------------------------------
ພິກຂຸທັງຫຼາຍ! ອຸເບກຂາທີ່ມີປະເພດຕ່າງກັນ ອາໃສອາລົມຕ່າງກັນ ກໍມີ ອຸເບກຂາທີ່ເປັນປະເພດດຽວກັນ ອາໃສອາລົມດຽວກັນ ກໍມີ ອຸເບກຂາທີ່ມີປະເພດຕ່າງກັນ ອາໄສອາລົມຕ່າງກັນກໍມີ ເປັນຢ່າງໃດ? ຄື:
ອຸເບກຂາໃນຮູບກໍມີ
ອຸເບກຂາໃນສຽງກໍມີ
ອຸເບກຂາໃນກິ່ນກໍມີ
ອຸເບກຂາໃນຣົດກໍມີ
ອຸເບກຂາໃນໂຜດຖັບພະກໍມີ
ອຸເບກຂາໃນທຳກໍມີ
ນີ້ຈັດເປັນອຸເບກຂາທີ່ມີປະເພດຕ່າງກັນ ອາໃສອາລົມຕ່າງກັນ.
--------------------------------------
ອຸເບກຂາທີ່ເປັນປະເພດດຽວກັນ ອາໃສອາລົມດຽວກັນ ເປັນຢ່າງໃດ? ຄື:
ອຸເບກຂາທີ່ອາໃສອາກາສານັນຈາຍະຕະນະກໍມີ
ອຸເບກຂາທີ່ອາໃສວິນຍານັນຈາຍະຕະນະກໍມີ
ອຸເບກຂາທີ່ອາໃສອາກິນຈັນຍາຍະຕະນະກໍມີ
ອຸເບກຂາທີ່ອາໃສເນວະສັນຍານາສັນຍາຍະຕະນະກໍມີ
ນີ້ຈັດເປັນອຸເບກຂາທີ່ເປັນປະເພດດຽວກັນ ອາໃສອາລົມດຽວກັນ.
--------------------------------------
ໃນອຸເບກຂາ 6 ປະການນັ້ນ ທ່ານທັງຫຼາຍອາໃສພຶ່ງພິງ ເບກຂາທີ່ເປັນປະເພດດຽວກັນ ອາໃສອາລົມດຽວກັນແລ້ວ ຈົ່ງລະ ຈົ່ງກ້າວລ່ວງ ອຸເບກຂາທີ່ມີປະເພດຕ່າງກັນ ອາໃສອາລົມຕ່າງກັນ ນັ້ນເສຍ ການລະ ການກ້າວລ່ວງອຸເບກຂານີ້ມີໄດ້ດ້ວຍອາການຢ່າງນີ້.
--------------------------------------
ພິກຂຸທັງຫຼາຍ! ທ່ານທັງຫຼາຍອາໃສພຶ່ງພິງ ອະຕັມມະຍະຕາ ແລ້ວ ຈົ່ງລະ ຈົ່ງກ້າວລ່ວງ ອຸເບກຂາທີ່ເປັນປະເພດດຽວກັນ ອາໃສອາລົມດຽວກັນເສຍ ການລະ ການກ້າວລ່ວງ ອຸເບກຂານີ້ມີໄດ້ດ້ວຍອາການຢ່າງນີ້.
ຄຳທີ່ເຮົາກ່າວແລ້ວວ່າ ໃນສັດຕະບົດ 36 ນັ້ນ ທ່ານທັງຫຼາຍອາໃສທຳນີ້ແລ້ວ ຈົ່ງລະທຳນີ້ເສຍ ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
--------------------------------------
--------------------------------------
ຄຳທີ່ເຮົາກ່າວແລ້ວວ່າ ພຶງຮູ້ສະຕິປັດຖານ 3 ທີ່ພຣະອະຣິຍະເສບ ຊຶ່ງເມື່ອເສບ ຊື່ວ່າເປັນຜູ້ສອນຄວນເພື່ອສັ່ງສອນໝູ່ ເພາະອາໃສເຫດຫຍັງ ເຮົາຈຶ່ງກ່າວໄວ້ເຊັ່ນນັ້ນ.
ພິກຂຸທັງຫຼາຍ! ຜູ້ສອນໃນໂລກນີ້ເປັນຜູ້ອານຸເຄາະ ສະເເຫວງຫາປະໂຫຍດເກື້ອກູນ ອາໃສຄວາມເອັນດູ ຈຶ່ງສະແດງທຳແກ່ສາວົກທັງຫຼາຍວ່າ ນີ້ເປັນໄປເພື່ອປະໂຫຍດເກື້ອກູນແກ່ທ່ານທັງຫຼາຍ ນີ້ເປັນໄປເພື່ອສຸກແກ່ທ່ານທັງຫຼາຍ ສາວົກທັງຫຼາຍຂອງຜູ້ສອນນັ້ນ ຍ່ອມບໍ່ຟັງ ບໍ່ງ່ຽງໂສຕະສະດັບ ບໍ່ຕັ້ງຈິດຮັບຮູ້ ແລະ ປະພຶດຫຼີກລ້ຽງຄຳສອນຂອງຜູ້ສອນ ໃນຂໍ້ນັ້ນ ຕະຖາຄົດບໍ່ມີໃຈຍິນດີ ບໍ່ຊື່ນຊົມ ແລະ ບໍ່ຖືກຣັ່ວຣົດ ມີສະຕິສຳປະຊັນຍາະຢູ່.
ພິກຂຸທັງຫຼາຍ! ນີ້ເຮົາເອີ້ນວ່າ ສະຕິປັດຖານປະການທີ່ 1 ທີ່ພຣະອະຣິຍະເສບ ຊຶ່ງເມື່ອເສບ ຊື່ວ່າເປັນຜູ້ສອນຄວນເພື່ອສັ່ງສອນໝູ່.
--------------------------------------
ອີກປະການໜຶ່ງ ຜູ້ສອນເປັນຜູ້ອະນຸເຄາະ ສະເເຫວງຫາປະໂຫຍດເກື້ອກູນ ອາໃສຄວາມເອັນດູ ຈຶ່ງສະແດງທຳແກ່ສາວົກທັງຫຼາຍວ່າ ນີ້ເປັນໄປເພື່ອປະໂຫຍດເກື້ອກູນແກ່ທ່ານທັງຫຼາຍ ນີ້ເປັນໄປເພື່ອສຸກແກ່ທ່ານທັງຫຼາຍ ສາວົກທັງຫຼາຍຂອງຜູ້ສອນນັ້ນ ບາງພວກບໍ່ຟັງ ບໍ່ງ່ຽງໂສຕະສະດັບ ບໍ່ຕັ້ງຈິດຮັບຮູ້ ແລະ ປະພຶດຫຼີກລ້ຽງຄຳສອນຂອງຜູ້ສອນ ບາງພວກຟັງດ້ວຍດີ ງ່ຽງໂສຕະສະດັບ ຕັ້ງຈິດຮັບຮູ້ ບໍ່ປະພຶດຫຼີກລ້ຽງຄຳສອນຂອງຜູ້ສອນ ໃນຂໍ້ນັ້ນ ຕະຖາຄົດກໍບໍ່ມີໃຈຍິນດີ ບໍ່ຊື່ນຊົມ ບໍ່ມີໃຈຍິນດີກໍບໍ່ແມ່ນ ບໍ່ຊື່ນຊົມ ກໍບໍ່ແມ່ນ ເວັ້ນຄວາມມີໃຈຍິນດີ ແລະ ຄວາມບໍ່ມີໃຈຍິນດີທັງ 2 ຢ່າງນັ້ນແລ້ວ ຈຶ່ງເປັນຜູ້ວາງເສຍ ມີສະຕິສຳປະຊັນຍະຢູ່.
ພິກຂຸທັງຫຼາຍ! ນີ້ເຮົາເອີ້ນວ່າ ສະຕິປັດຖານປະການທີ່ 2 ທີ່ພຣະອະຣິຍະເສບ ຊຶ່ງເມື່ອເສບ ຊື່ວ່າເປັນຜູ້ສອນຄວນເພື່ອສັ່ງສອນໝູ່.
--------------------------------------
ອີກປະການໜຶ່ງ ຜູ້ສອນເປັນຜູ້ອານຸເຄາະ ແສວງຫາປະໂຫຍດເກື້ອກູນ ອາໃສຄວາມເອັນດູຈຶ່ງສະແດງທຳແກ່ສາວົກທັງຫຼາຍວ່າ ນີ້ເປັນໄປເພື່ອປະໂຫຍດເກື້ອກູນແກ່ທ່ານທັງຫຼາຍ ນີ້ເປັນໄປເພື່ອສຸກແກ່ທ່ານທັງຫຼາຍ ສາວົກທັງຫຼາຍຂອງຜູ້ສອນນັ້ນ ຍ່ອມຟັງດ້ວຍດີ ງ່ຽງໂສຕະສະດັບ ຕັ້ງຈິດຮັບຮູ້ ບໍ່ປະພຶດຫຼີກລ້ຽງຄຳສອນຂອງຜູ້ສອນ ໃນຂໍ້ນັ້ນ ຕະຖາຄົດມີໃຈຍິນດີ ຊື່ນຊົມ ແລະ ບໍ່ຖືກຣັ່ວຣົດ ມີສະຕິສຳປະຊັນຍະຢູ່.
ພິກຂຸທັງຫຼາຍ! ນີ້ເຮົາເອີ້ນວ່າ ສະຕິປັດຖານປະການທີ່ 3 ທີ່ພຣະອະຣິຍະເສບ ຊຶ່ງເມື່ອເສບ ຊື່ວ່າເປັນຜູ້ສອນຄວນເພື່ອສັ່ງສອນໝູ່.
ຄຳທີ່ເຮົາກ່າວແລ້ວວ່າ ພຣະອະຣິຍະເສບທຳ ຄື ສະຕິປັດຖານ 3 ຊຶ່ງເມື່ອເສບ ຊື່ວ່າເປັນຜູ້ສອນຄວນເພື່ອສັ່ງສອນໝູ່ ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
--------------------------------------
ຄຳທີ່ເຮົາກ່າວແລ້ວວ່າ ພຣະອະຣິຍະນັ້ນອັນເຮົາເອີ້ນວ່າ ເປັນສາຣະຖີຜູ້ສາມາດຝຶກບຸຣຸດທີ່ຄວນຝຶກໄດ້ຢ່າງຢອດຢ້ຽມກວ່າອາຈານຜູ້ຝຶກທັງຫຼາຍ ເພາະອາໃສເຫດຫຍັງ ເຮົາຈຶ່ງກ່າວໄວ້ເຊັ່ນນັ້ນ.
ພິກຂຸທັງຫຼາຍ! ຊ້າງ ທີ່ຄວນຝຶກ ອັນຄົນຝຶກຊ້າງບັງຄັບໃຫ້ເເລ່ນ ຍ່ອມເເລ່ນໄປສູ່ທິດດຽວເທົ່ານັ້ນ ຄື ທິດຕາເວັນອອກ ທິດຕະເວັນຕົກ ທິດເໜືອ ຫລື ທິດໃຕ້.
ມ້າ ທີ່ຄວນຝຶກ ອັນຄົນຝຶກມ້າບັງຄັບໃຫ້ເເລ່ນ ຍ່ອມເເລ່ນໄປສູ່ທິດດຽວເທົ່ານັ້ນ ຄື ທິດຕາເວັນອອກ ທິດຕາເວັນຕົກ ທິດເໜືອ ຫລື ທິດໃຕ້.
ງົວ ທີ່ຄວນຝຶກ ອັນຄົນຝຶກງົວບັງຄັບໃຫ້ເເລ່ນ ຍ່ອມເເລ່ນໄປສູ່ທິດດຽວເທົ່ານັ້ນ ຄື ທິດຕາເວັນອອກ ທິດຕາເວັນຕົກ ທິດເໜືອ ຫລື ທິດໃຕ້.
ແຕ່ບຸຣຸດທີ່ຄວນຝຶກ ອັນຕະຖາຄົດອະຣະຫັນຕະສັມມາສັມພຸດທະສອນໃຫ້ເເລ່ນ ຍ່ອມເເລ່ນໄປໄດ້ຕະຫລອດທັງ 8 ທິດ ຄື:
ຜູ້ມີຮູບ ຍ່ອມເຫັນຮູບທັງຫຼາຍໄດ້ ນີ້ເປັນທິດທີ່ 1.
ຜູ້ມີສັນຍາໃນອະຮູບໃນພາຍໃນ ຍ່ອມເຫັນຮູບທັງຫຼາຍໃນພາຍນອກໄດ້ ນີ້ເປັນທິດທີ່ 2.
ເປັນຜູ້ນ້ອມໃຈວ່າງາມທັງນັ້ນ ນີ້ເປັນທິດທີ່ 3.
ເພາະກ້າວລ່ວງຮູບປະສັນຍາ ເພາະດັບປະຕິຄະສັນຍາ ເພາະບໍ່ໃສ່ໃຈນານັດຕະສັນຍາ ໂດຍປະການທັງປວງ ຈຶ່ງບັນລຸອາກາສານັນຈາຍະຕະນະຢູ່ ດ້ວຍການເຮັດໃນໃຈວ່າ ອາກາດບໍ່ມີທີ່ສີ້ນ ສຸດ ນີ້ເປັນທິດທີ່ 4.
ເພາະກ້າວລ່ວງອາກາສານັນຈາຍະຕະນະໄດ້ໂດຍປະການທັງປວງ ຈຶ່ງບັນລຸວິນຍານັນຈາຍະຕະນະຢູ່ ດ້ວຍການເຮັດໃນໃຈວ່າ ວິນຍານບໍ່ມີທີ່ສີ້ນສຸດ ນີ້ເປັນທິດທີ່ 5.
ເພາະກ້າວລ່ວງວິນຍານັນຈາຍະຕະນະໄດ້ໂດຍປະການທັງປວງ ຈຶ່ງບັນລຸອາກິນຈັນຍາຍະຕະນະຢູ່ ດ້ວຍການທຳໃນໃຈວ່າ ອີຫຍັງໆ ກໍບໍ່ມີ ນີ້ເປັນທິດທີ່ 6.
ເພາະກ້າວລ່ວງອາກິນຈັນຍາຍະຕະນະໄດ້ໂດຍປະການທັງປວງ ຈຶ່ງບັນລຸເນວະສັນຍານາສັນຍາຍະຕະນະຢູ່ ນີ້ເປັນທິດທີ່ 7.
ເພາະກ້າວລ່ວງເນວະສັນຍານາສັນຍາຍະຕະນະໄດ້ໂດຍປະການທັງປວງ ຈຶ່ງບັນລຸສັນຍາເວທະຢິດຕະນິໂຣດຢູ່ ນີ້ເປັນທິດທີ່ 8.
ພິກຂຸທັງຫຼາຍ! ບຸຣຸດທີ່ຄວນຝຶກອັນຕະຖາຄົດອະຣະຫັນຕະສັມມາສັມພຸດທະສອນໃຫ້ເເລ່ນ ຍ່ອມເເລ່ນໄປໄດ້ຕະຫລອດທັງ 8 ທິດ.
ຄຳທີ່ເຮົາກ່າວແລ້ວວ່າ ພຣະອະຣິຍະນັ້ນອັນເຮົາເອີ້ນວ່າ ເປັນສາຣະຖີຜູ້ສາມາດຝຶກບຸຣຸດທີ່ຄວນຝຶກໄດ້ຢ່າງຢອດຢ້ຽມກວ່າອາຈານຜູ້ຝຶກທັງຫຼາຍ ດັ່ງນີ້ນັ້ນ ເຮົາອາໃສຄວາມຂໍ້ນີ້ກ່າວແລ້ວ.
-ບາລີ ອຸປຣິ. ມ. ໑໔/໔໐໐/໖໑໗
Comments
Post a Comment