ໂລກກະທຳ 8
ພິກຂຸທັງຫລາຍ! ໂລກະທັມ 8 ປະການນີ້ ຍ່ອມໝູນໄປຕາມໂລກ ແລະ ໂລກກໍໝູນໄປຕາມໂລກະທັມ 8 ປະການນີ້; 8 ປະການເປັນຢ່າງໃດ? ຄື:
ລາບ ຄວາມເສື່ອມລາບ
ຍົດ ຄວາມເສື່ອມຍົດ
ນິນທາ ສັນລະເສີນ
ສຸກ ທຸກ
ພິກຂຸທັງຫລາຍ! ໂລກະທັມ 8 ປະການນີ້ແລ ຍ່ອມໝູນໄປຕາມໂລກ ແລະ ໂລກກໍໝູນໄປຕາມໂລກະທັມ 8 ປະການນີ້.
ພິກຂຸທັງຫລາຍ!
ລາບເເດ່ ຄວາມເສື່ອມລາບເເດ່,
ຍົດເເດ່ ຄວາມເສື່ອມຍົດເເດ່,
ນິນທາເເດ່ ສັນລະເສີນເເດ່,
ສຸກເເດ່ ທຸກເເດ່,
ຍ່ອມເກີດຂຶ້ນກັບປຸຖຸຊົນຜູ້ບໍ່ໄດ້ສະດັບ(ບໍ່ໄດ້ຟັງ) ແລະ ຍ່ອມເກີດຂຶ້ນກັບອະຣິຍະສາວົກຜູ້ໄດ້ສະດັບ(ໄດ້ຟັງ).
ພິກຂຸທັງຫລາຍ! ອັນໃດເປັນຄວາມຜິດແປກແຕກຕ່າງກັນລະຫວ່າງອະຣິຍະສາວົກທີ່ໄດ້ສະດັບ ກັບປຸຖຸຊົນທີ່ບໍ່ໄດ້ສະດັບ?
ຂ້າແຕ່ພຣະອົງຄ໌ຜູ້ຈະເຣີນ! ທັມຂອງພວກຂ້ານ້ອຍທັງຫລາຍມີພຣະຜູ້ມີພຣະພາກເປັນມູນ ມີພຣະຜູ້ມີພຣະພາກເປັນຜູ້ນຳ ມີພຣະຜູ້ມີພຣະພາກເປັນທີ່ເພິ່ງອາໄສ; ຂ້າແຕ່ພຣະອົງຜູ້ຈະເຣີນ ຂໍປະທານໂອກາດ ຂໍເນື້ອຄວາມແຫ່ງພາສິດນີ້ຈົ່ງແຈ່ມແຈ້ງກັບພຣະຜູ້ມີພຣະພາກເຖີດ
ພິກຂຸທັງຫລາຍໄດ້ສະດັບຕໍ່ພຣະຜູ້ມີພຣະພາກແລ້ວ ຈັກຊົງຈຳໄວ້.
ພິກຂຸທັງຫລາຍ! ຖ້າຢ່າງນັ້ນ ພວກເຈົ້າທັງຫລາຍຈົ່ງຟັງ ຈົ່ງໃສ່ໃຈໃຫ້ດີ ເຮົາຈັກກ່າວ.
ພິກຂຸທັງຫລາຍ! ລາບທີ່ເກີດຂຶ້ນກັບປຸຖຸຊົນຜູ້ບໍ່ໄດ້ສະດັບ ເຂົາຍ່ອມບໍ່ຮູ້ຊັດຕາມຄວາມເປັນຈິງວ່າ: ລາບນີ້ເກີດຂຶ້ນແລ້ວແກ່ເຮົາ ແຕ່ວ່າລາບນັ້ນເປັນຂອງບໍ່ທ່ຽງ ເປັນທຸກ ມີຄວາມປ່ຽນແປງເປັນທັມມະດາ,
ຄວາມເສື່ອມລາບ...
ຍົດ... ຄວາມເສື່ອມຍົດ...
ນິນທາ... ສັນລະເສີນ...
ສຸກ... ທຸກ...
ທີ່ເກີດຂຶ້ນກັບປຸຖຸຊົນຜູ້ບໍ່ໄດ້ສະດັບ ເຂົາຍ່ອມບໍ່ຮູ້ຊັດຕາມຄວາມເປັນຈິງວ່າ: ທຸກນີ້ເກີດຂຶ້ນແລ້ວແກ່ເຮົາ ແຕ່ວ່າທຸກນັ້ນກໍເປັນຂອງບໍ່ທ່ຽງ ເປັນທຸກ ມີຄວາມປ່ຽນແປງເປັນທັມມະດາ
ລາບຍ່ອມຄອບງຳຈິດຂອງເຂົາໄດ້ ຄວາມເສື່ອມລາບ...
ຍົດ... ຄວາມເສື່ອມຍົດ...
ນິນທາ... ສັນລະເສີນ...
ສຸກ... ທຸກຂ໌...
ຍ່ອມຄອບງຳຈິດຂອງເຂົາໄດ້
- ເຂົາຍ່ອມຍິນດີໃນລາບທີ່ເກີດຂຶ້ນ, ຍ່ອມຍິນຮ້າຍໃນຄວາມເສື່ອມລາບ;
- ຍ່ອມຍິນດີໃນຍົດທີ່ເກີດຂຶ້ນ ຍ່ອມຍິນຮ້າຍໃນຄວາມເສື່ອມຍົດ;
- ຍ່ອມຍິນດີໃນສັນລະເສີນທີ່ເກີດຂຶ້ນ ຍ່ອມຍິນຮ້າຍໃນນິນທາ;
- ຍ່ອມຍິນດີໃນສຸກທີ່ເກີດຂຶ້ນ ຍ່ອມຍິນຮ້າຍໃນທຸກ;
ເຂົາປະກອບດ້ວຍຄວາມຍິນດີຍິນຮ້າຍຢູ່ຢ່າງນີ້ ຍ່ອມບໍ່ພົ້ນໄປຈາກຊາ(ການເກີດ) ຊະຣາ(ຄວາມເເກ່) ມະຣະນະ(ຄວາມຕາຍ) ໂສກະ ປະຣິເທວະ ທຸກຂ໌ ໂທມະນັດ ແລະ ອຸປາຍາສະ ເຮົາກ່າວວ່າ: ຍ່ອມບໍ່ພົ້ນໄປຈາກທຸກຂ໌ໄດ້.
ພິກຂຸທັງຫລາຍ! ລາບຍ່ອມເກີດຂຶ້ນກັບອະຣິຍະສາວົກຜູ້ໄດ້ສະດັບ ອະຣິຍະສາວົກນັ້ນ ຍ່ອມຮູ້ຊັດຕາມຄວາມເປັນຈິງວ່າ: ລາບເກີດຂຶ້ນແລ້ວແກ່ເຮົາ ກໍແຕ່ວ່າ ລາບນັ້ນບໍ່ທ່ຽງ ເປັນທຸກຂ໌ ມີຄວາມປ່ຽນແປງເປັນທັມມະດາ.
ຄວາມເສື່ອມລາບ...
ຍົດ... ຄວາມເສື່ອມຍົດ...
ນິນທາ... ສັນລະເສີນ...
ສຸກ... ທຸກ
ຍ່ອມເກີດຂຶ້ນກັບອະຣິຍະສາວົກຜູ້ໄດ້ສະດັບ ອະຣິຍະສາວົກນັ້ນ ຍ່ອມຮູ້ຊັດຕາມຄວາມເປັນຈິງວ່າ: ທຸກຂ໌ເກີດຂຶ້ນແລ້ວແກ່ເຮົາ ກໍແຕ່ວ່າ ທຸກຂ໌ນັ້ນບໍ່ທ່ຽງ ເປັນທຸກ ມີຄວາມປ່ຽນແປງເປັນທັມມະດາ
ລາບຈຶ່ງຄອບງໍາຈິດຂອງເຂົາບໍ່ໄດ້, ຄວາມເສື່ອມລາບ...
ຍົດ... ຄວາມເສື່ອມຍົດ...
ນິນທາ... ສັນລະເສີນ...
ສຸກ...ທຸກຂ໌ຈຶ່ງຄອບງຳຈິຕຂອງເຂົາບໍ່ໄດ້
- ເຂົາຍ່ອມບໍ່ຍິນດີໃນລາບທີ່ເກີດຂຶ້ນ ຍ່ອມບໍ່ຍິນຮ້າຍໃນຄວາມເສື່ອມລາບ;
- ຍ່ອມບໍ່ຍິນດີໃນຍົດທີ່ເກີດຂຶ້ນ ຍ່ອມບໍ່ຍິນຮ້າຍໃນຄວາມເສື່ອມຍົດ;
- ຍ່ອມບໍ່ຍິນດີໃນສັນລະເສີນທີ່ເກີດຂຶ້ນ ຍ່ອມບໍ່ຍິນຮ້າຍໃນນິນທາ;
- ຍ່ອມບໍ່ຍິນດີໃນສຸກທີ່ເກີດຂຶ້ນ ຍ່ອມບໍ່ຍິນຮ້າຍໃນທຸກ;
ເຂົາລະຄວາມຍິນດີຍິນຮ້າຍໄດ້ເດັດຂາດແລ້ວຢ່າງນີ້ ຍ່ອມພົ້ນໄປຈາກຊາດ ຊະຣາ ມະຣະນະ ໂສກະ ປະຣິເທວະ ທຸກຂ໌ ໂທມະນັດ ອຸປາຍາສະ ເຮົາກ່າວວ່າ: ຍ່ອມພົ້ນໄປຈາກທຸກຂ໌ໄດ້.
ພິກຂຸທັງຫລາຍ! ນີ້ແລ ເປັນຄວາມຜິດແປກແຕກຕ່າງກັນລະຫວ່າງອະຣິຍະສາວົກຜູ້ໄດ້ສະດັບ ກັບປຸຖຸຊົນຜູ້ບໍ່ໄດ້ສະດັບ.
....................................
ສຸຕຕັນຕະປິດົກ ອັງຄຸຕຕະຣະນິກາຍ
ສັຕຕະກະ-ອັຖກະ-ນະວະກະນິບາຕ ໒໓/໑໒໓-໑໒໕/໙໖.
Comments
Post a Comment